නීතිපති දෙපාර්තමේන්තුවේ පවතින කාර්ය මණ්ඩල හිඟය හේතුවෙන් එක් අභිචෝදකයෙකුට විශාල නඩු ප්රමාණයක් මෙහෙයවීමට සිදුව ඇති පසුබිමක, එහි පවතින පුරප්පාඩු පියවීම සඳහා රජයේ අධිනීතිඥවරුන් 32 දෙනෙකු බඳවා ගැනීමට රාජ්ය සේවා කොමිෂන් සභාවේ අනුමැතිය ලබන සතියේදී හිමිවීමට නියමිත බව වාර්තා වේ.
‘ද සන්ඩේ මෝනිං’ පුවත්පත වාර්තා කර ඇති පරිදි, නීතිපති දෙපාර්තමේන්තුවේ රජයේ අධිනීතිඥ පුරප්පාඩු 77ක් පැවති අතර, ඉන් පුරප්පාඩු 32ක් සඳහා මේ වන විට බඳවා ගැනීම් සිදුකර තිබේ. එම පත්වීම් සඳහා රාජ්ය සේවා කොමිෂන් සභාවේ අනුමැතිය ලැබීමට නියමිතය.
රාජ්ය සේවා කොමිෂන් සභාවේ ලේකම් ඩබ්.එච්.එම්.එම්.සී.කේ. දයාරත්න මහත්මිය සඳහන් කර ඇත්තේ නීතිපති දෙපාර්තමේන්තුවට අදාළ කටයුතුවලදී කොමිසම පාර්ශ්වයෙන් කිසිදු ප්රමාදයක් සිදුව නොමැති බවයි. මේ වන විට කොමිසම හමුවේ ඉතිරිව ඇත්තේ රජයේ අධිනීතිඥවරුන් 32 දෙනාගේ පත්වීම් සඳහා අනුමැතිය ලබාදීම පමණක් බවත්, එය ලබන සතිය වන විට සිදු කළ හැකි බවත් ඇය පවසා තිබේ.
කෙසේ වෙතත්, දැනට සේවයේ නියුතු රජයේ අධිනීතිඥවරුන් 37 දෙනෙකු ජ්යෙෂ්ඨ රජයේ අධිනීතිඥවරුන් ලෙස උසස්වීමට නියමිත බැවින්, පවතින පුරප්පාඩු සංඛ්යාව ඉදිරියේදී තවදුරටත් ඉහළ යාමේ අවදානමක් පවතින බව නීතිපති දෙපාර්තමේන්තු ආරංචි මාර්ග සඳහන් කර ඇත.
මේ අතර, නීතිපති දෙපාර්තමේන්තුවේ ආධුනික පුහුණුව සඳහා අලුතින් සමත් වූ නීතිඥවරුන්ගෙන් වාර්තාගත අයදුම්පත් සංඛ්යාවක් ලැබී ඇති බව ‘සන්ඩේ ටයිම්ස්’ පුවත්පත වාර්තා කර තිබේ. සාමාන්යයෙන් අයදුම්පත් 80ක් පමණ ලැබෙන නමුත් මෙවර අයදුම්පත් 200කට වැඩි සංඛ්යාවක් ලැබී ඇති බව සඳහන් වේ.
එමෙන්ම කොළඹ සහ යාපනය විශ්වවිද්යාලවල නීති පීඨයන්හි උපාධි අපේක්ෂකයින් සඳහා නීතිපති දෙපාර්තමේන්තුව තුළ සීමාවාසික පුහුණු අවස්ථා ලබාදෙන ලෙසද එම විශ්වවිද්යාල ඉල්ලීම් ඉදිරිපත් කර තිබේ.
නීතිපති දෙපාර්තමේන්තුව තවදුරටත් ශක්තිමත් කිරීම සඳහා අතිරේක නිලධාරීන් 50 දෙනෙකු බඳවා ගැනීමට රජයේ අනුමැතිය ලබාදී ඇති බවද ජනාධිපති අනුර කුමාර දිසානායක මහතා මෑතකදී ප්රකාශ කර තිබේ.
නීතිපති දෙපාර්තමේන්තුවට නවක නිලධාරීන් විශාල සංඛ්යාවක් එකවර බඳවා ගැනීම වෙනුවට, අදියරෙන් අදියර 30–40 බැගින් බඳවාගෙන ඔවුන් අධීක්ෂණය යටතේ කුඩා නඩු මෙහෙයවීම සඳහා යොමු කිරීම වඩාත් ප්රායෝගික බව ජනාධිපතිවරයා පෙන්වා දී ඇත. නීති ක්ෂේත්රයේ අවශ්ය පළපුරුද්ද ලබා ගැනීමට වසර කිහිපයක් ගතවන බැවින් එම ක්රමවේදය අනුගමනය කරන බවද ඔහු සඳහන් කර තිබේ.
නීතිපති දෙපාර්තමේන්තුවේ නිලධාරීන් රඳවා ගැනීම සඳහා උසස්වීම් ක්රියාවලිය සංශෝධනය කිරීම, දීමනා වැඩි කිරීම සහ සුදුසු වැටුප් ව්යුහයක් සකස් කිරීම පිළිබඳවද රජයේ අවධානය යොමුව ඇති බව ජනාධිපතිවරයා ප්රකාශ කර තිබේ.
අධිකරණ පද්ධතියේ කාර්යක්ෂමතාව ඉහළ නැංවීම සඳහා අධිකරණ සංඛ්යාව වැඩි කිරීම, නව මහාධිකරණ පිහිටුවීම සහ මහේස්ත්රාත් අධිකරණ සංඛ්යාව වැඩි කිරීම පිළිබඳවද රජය අවධානය යොමු කර ඇති බව සඳහන් වේ. මේ වන විට නව අධිකරණ 15ක් එක් කර ඇති අතර, නඩු ප්රමාණය සැලකිල්ලට ගනිමින් නව මහාධිකරණ 11ක් සඳහා ස්ථාන හඳුනාගෙන ඇති බවද ජනාධිපතිවරයා පවසා ඇත.
එමෙන්ම අධිකරණ ක්රියාවලිය ඩිජිටල්කරණය කිරීමේ ‘ඊ-කෝට්’ ව්යාපෘතිය යටතේ අන්තර්ජාලය ඔස්සේ පෙත්සම් ගොනු කිරීම ඇතුළු පහසුකම් හඳුන්වාදීමට කටයුතු කරමින් සිටින බවත්, එම ව්යාපෘතිය සම්පූර්ණයෙන් ක්රියාත්මක කිරීමට තවත් වසරක් හෝ දෙකක් පමණ ගතවනු ඇති බවත් ජනාධිපතිවරයා සඳහන් කර තිබේ.
අධිකරණ පද්ධතියේ කාර්යක්ෂමතාව ඉහළ නැංවීමේ සමස්ත ක්රියාවලියේ කොටසක් ලෙස විනිසුරුවරුන්ගේ සේවා වයස් සීමාව සම්බන්ධයෙන්ද අවධානය යොමු කර ඇති බව ජනාධිපතිවරයා වැඩිදුරටත් ප්රකාශ කර ඇත.
මූලාශ්රය What News