ජාත්‍යන්තර මූල්‍ය අරමුදල (IMF) විසින් පිරිනමනු ලබන විස්තීර්ණ ණය පහසුකම (EFF) යටතේ වන ආර්ථික ප්‍රතිසංස්කරණ වැඩසටහනේ හත්වැනි සමාලෝචනය සාර්ථකව නිම කරමින් ශ්‍රී ලංකා බලධාරීන් සහ IMF කාර්ය මණ්ඩලය අතර කාර්ය මණ්ඩල මට්ටමේ එකඟතාවකට එළඹ තිබේ. මෙම එකඟතාව IMF විධායක මණ්ඩලයේ අවසන් අනුමැතියට යටත්වන අතර, එම අනුමැතිය හිමිවීමෙන් පසු අමෙරිකානු ඩොලර් මිලියන 345ක පමණ හත්වන වාරිකය මුදාහැරීමට නියමිතය. ඒ සමඟම මෙරටට IMF වෙතින් ලැබෙන සමස්ත මූල්‍ය සහාය ඩොලර් බිලියන 2.7කට ආසන්න වනු ඇත. කෙසේ වෙතත්, මෙම අනුමැතිය ලබා ගැනීමට පෙර 2027 අයවැය සකස් කිරීම සහ අදාළ මූල්‍ය සහතික සමාලෝචනය සම්පූර්ණ කිරීම වැනි පූර්ව කොන්දේසි සපුරාලිය යුතුව තිබේ.
බාහිර කම්පන හමුවේ වුවද ශ්‍රී ලංකා ආර්ථිකය සැලකිය යුතු ස්ථාවරත්වයක් පෙන්වා ඇති බව IMF දූත මණ්ඩල ප්‍රධානී එවන් පපර්ජියෝර්ජියෝ මහතා සඳහන් කරයි. 2026 වසරේ දෙවැනි කාර්තුවේදී සියයට 4.2ක ආර්ථික වර්ධනයක් වාර්තා කරමින් අඛණ්ඩව 11 වන කාර්තුවටත් ධනාත්මක වර්ධනයක් සටහන් කර ගැනීමට ශ්‍රී ලංකාව සමත්ව ඇත. මීට අමතරව 2026 සැප්තැම්බර් වන විට උද්ධමනය සියයට 8ක තනි ඉලක්කමක පැවති අතර, අගෝස්තු අග වන විට දළ නිල විදේශ සංචිත ඩොලර් බිලියන 6.9 දක්වා ඉහළ ගොස් තිබේ. රාජ්‍ය මූල්‍ය ප්‍රතිඵල ශක්තිමත් වීම, බැංකු පද්ධතියේ ලාභදායිත්වය රැකගැනීම සහ ණය ප්‍රතිව්‍යුහගත කිරීමේ කටයුතු අවසන් අදියරට පැමිණීම ආර්ථිකයේ සාධනීය ලක්ෂණ ලෙස පෙන්වා දී ඇත.
කෙසේ වෙතත්, ගෝලීය සහ දේශීය වශයෙන් මතුවිය හැකි අවදානම් පිළිබඳවද IMF අවධානය යොමු කර ඇත. මැද පෙරදිග පවතින අර්බුදකාරී තත්ත්වය, ගෝලීය වෙළෙඳ ප්‍රතිපත්තිවල වෙනස්කම් සහ එල්නිනෝ කාලගුණික බලපෑම් ඉදිරි ගමනට තර්ජනයක් විය හැකිය. විශේෂයෙන්ම මැද පෙරදිග යුද්ධය දිගු වුවහොත්, ලෝක වෙළෙඳපොළේ තෙල් මිල වෙනස්වීම්වලට අනුකූලව දේශීය ඉන්ධන සහ බලශක්ති මිල ගැලපීම් සිදුකළ යුතු බව පෙන්වා දී තිබේ. එමෙන්ම, මිල ඉහළ යාම් හමුවේ අඩු ආදායම්ලාභී සහ අවදානමට ලක්වූ කාණ්ඩ ඉලක්කගත සහන මඟින් ආරක්ෂා කිරීම සහ උද්ධමන පීඩනය වැඩි වුවහොත් මුදල් ප්‍රතිපත්තිය දැඩි කිරීමට සූදානම්ව සිටීමේ වැදගත්කමද අවධාරණය කර ඇත.
දීර්ඝ කාලීන ස්ථාවරත්වය සහ සියලු දෙනාට ප්‍රතිලාභ ලැබෙන ආර්ථික වර්ධනයක් උදෙසා තවත් ව්‍යූහාත්මක ප්‍රතිසංස්කරණ ගණනාවක් යෝජනා කර තිබේ. රාජ්‍ය ආදායම් වර්ධනය කරගැනීම සඳහා මධ්‍ය කාලීන වැඩපිළිවෙළක් සකස් කිරීම, බදු පද්ධතිය කාර්යක්ෂම කිරීම, විනිමය අනුපාතිකයට නම්‍යශීලී වීමට ඉඩදීම, දූෂණ විරෝධී නීති දැඩි කිරීම මෙන්ම ව්‍යාපාර හා කම්කරු නීති නවීකරණය කිරීම ඊට ඇතුළත්ය. අගෝස්තු සහ සැප්තැම්බර් මාසවල පැවති IMF දූත මෙහෙයුමෙන් පසුව, මහ බැංකු අධිපති ආචාර්ය නන්දලාල් වීරසිංහ, භාණ්ඩාගාර ලේකම් ආචාර්ය හර්ෂණ සූරියප්පෙරුම සහ ජනාධිපති ජ්‍යෙෂ්ඨ ආර්ථික උපදේශක දුමින්ද හුලංගමුව යන මහත්වරුන් ඇතුළු ජ්‍යෙෂ්ඨ නිලධාරීන් සමඟ පැවැත්වූ මාර්ගගත සාකච්ඡාවලින් අනතුරුව මෙම එකඟතාව සාර්ථකව තහවුරු කරගෙන ඇත.