ආසියානු කලාපයේ වේගයෙන් වර්ධනය වන ආර්ථිකයන් 18 අතරට ශ්‍රී ලංකාව ද ඇතුළත්ව ඇති අතර, 2026 සහ 2027 වසර දෙකේදීම මෙරට ආර්ථිකය 4%ක වර්ධන වේගයක් අත්කර ගනු ඇතැයි පුරෝකථනය කර තිබේ.
ආසියානු සංවර්ධන බැංකුවේ (ADB) 2026 සැප්තැම්බර් ආර්ථික ඉදිරි දැක්ම වාර්තාවේ දත්ත පදනම් කරගනිමින් Visual Capitalist ආයතනය සකස් කළ ශ්‍රේණිගත කිරීමක මේ බව සඳහන් වේ.
මෙම පුරෝකථනයට අනුව ශ්‍රී ලංකාව ඉදිරි වසර දෙක තුළ අඛණ්ඩව 4%ක ආර්ථික වර්ධනයක් පවත්වා ගැනීමට අපේක්ෂා කෙරේ. එහෙත්, එම වර්ධන වේගය කලාපයේ ඉහළම වර්ධන අනුපාත සහිත ආර්ථිකයන්ට සාපේක්ෂව පහළ මට්ටමක පවතී.
ලැයිස්තුවේ ඉදිරියෙන්ම සිටින තායිවානය 2026 වසරේදී 11%ක වර්ධනයක් අත්කර ගනු ඇතැයි පුරෝකථනය කර ඇති අතර, කිර්ගිස්තානයට 8.9%ක සහ වියට්නාමයට 7.8%ක වර්ධනයක් අපේක්ෂා කර තිබේ. ඉන්දියාව 7%ක වර්ධන වේගයක් අත්කර ගනු ඇතැයි ද සඳහන් වේ.
මීට අමතරව, භූතානයේ ආර්ථිකය 6.5%කින් ද, ඉන්දුනීසියාවේ 5.2%කින් ද, මැලේසියාවේ 4.9%කින් ද වර්ධනය වනු ඇතැයි පුරෝකථනය කර තිබේ. චීනය සඳහා 4.6%ක වර්ධනයක් ද, හොංකොං සඳහා 4.2%ක වර්ධනයක් ද අපේක්ෂා කෙරේ.
මෙම සංඛ්‍යා ලේඛන අනුව ශ්‍රී ලංකාව ඉදිරි වසර දෙක තුළ ධනාත්මක ආර්ථික වර්ධනයක් පවත්වා ගැනීමට අපේක්ෂා කළ ද, එම වර්ධනයේ ප්‍රතිලාභ ජනතාවගේ ජීවන වියදම, රැකියා අවස්ථා සහ ආදායම් මට්ටම් කෙරෙහි කෙතරම් බලපානු ඇත්ද යන්න ද වැදගත් කරුණකි.
ආර්ථික වර්ධන අනුපාතය ඉහළ යාම පමණක් රටක ආර්ථික ස්ථාවරත්වය හෝ ජනතාවගේ ජීවන තත්ත්වය සම්පූර්ණයෙන් පිළිබිඹු නොකරයි. එබැවින්, ශ්‍රී ලංකාවේ ආර්ථික ප්‍රගතිය තක්සේරු කිරීමේදී වර්ධන පුරෝකථනවලට අමතරව උද්ධමනය, රැකියා නියුක්තිය, සැබෑ ආදායම් සහ ආර්ථිකයේ වර්ධනයෙන් ලැබෙන ප්‍රතිලාභ බෙදී යන ආකාරය ද සැලකිල්ලට ගත යුතුය.
කෙසේ වෙතත්, මෙම පුරෝකථන ඉදිරි වසර දෙක තුළ ශ්‍රී ලංකාවේ ආර්ථිකය අඛණ්ඩව වර්ධනය වනු ඇතැයි අපේක්ෂා කරන බව පෙන්වා දෙයි.