වසර කිහිපයකට පසු වාහන ආනයන සීමා ලිහිල් කිරීමත් සමඟ 2026 වසරේ පළමු මාස හය තුළ ශ්රී ලංකා රජයේ සමස්ත ආදායම කැපී පෙනෙන ලෙස ඉහළ ගොස් ඇති බව මුදල් අමාත්යාංශ දත්ත පෙන්වා දෙයි. 2026 ජනවාරි සිට ජූනි දක්වා කාලය තුළ රජයේ සමස්ත ආදායම සහ ප්රදාන (grants) ප්රමාණය 2025 වසරේ අනුරූප කාලයට සාපේක්ෂව 27.1%කින් වැඩි වී රුපියල් ට්රිලියන 2.956ක් ලෙස සටහන් විය. මෙය 2026 වසර සඳහා අපේක්ෂිත රුපියල් ට්රිලියන 5.3ක වාර්ෂික ආදායම් ඉලක්කයෙන් 55.8%ක ප්රගතියකි. ප්රදාන හැර රජයේ ආදායම පමණක් සැලකූ විට එය රුපියල් බිලියන 2,321.7 සිට රුපියල් බිලියන 2,954.2 දක්වා 27%කින් වර්ධනය වී තිබේ.
මෙම ආදායම් වර්ධනය සඳහා මෝටර් රථ ආනයනයෙන් ලැබුණු බදු ආදායම ප්රධාන වශයෙන් බලපා ඇත. 2025 මුල් භාගයේදී රුපියල් බිලියන 129.1ක් වූ මෝටර් රථ ආනයන තීරු බදු සහ සුරාබදු ආදායම, 2026 මුල් භාගයේදී දෙගුණයකටත් වඩා වැඩි වෙමින් රුපියල් බිලියන 266.4ක් දක්වා ඉහළ ගියේය. මීට අමතරව රේගුව මඟින් එකතු කළ සමස්ත සුරාබදු ආදායම 46%කින් වැඩි වී රුපියල් බිලියන 424.2ක් වූ අතර, ආනයනික භාණ්ඩ මත පනවන වැට් (VAT) බදු ආදායම ද 25%කින් ඉහළ ගොස් රුපියල් බිලියන 443.7ක් ලෙස සටහන් විය.
රටේ සමස්ත බදු ව්යුහය තුළ තවදුරටත් භාණ්ඩ හා සේවා මත පනවා ඇති වක්ර බදු ප්රධාන තැනක් ගන්නා අතර මුල් මාස හයේ මුළු ආදායමෙන් 60%ක්ම ලැබී ඇත්තේ එමඟිනි. දේශීය සහ ආනයනික වැට් බදු ඇතුළත්ව මුළු වැට් (VAT) ආදායම රුපියල් බිලියන 987.6ක් (25%ක වර්ධනයක්) දක්වා ඉහළ යමින් රජයේ විශාලතම ආදායම් මාර්ගය බවට පත්ව තිබේ. දේශීය ආදායම් දෙපාර්තමේන්තුව රැස්කළ රුපියල් ට්රිලියන 1.248ක ආදායම අතරින් ආදායම් බදු 16%කින් සහ දේශීය වැට් බදු 26%කින් වර්ධනය වී ඇත. වාහන ආනයනය යළි ඇරඹීම මූල්ය ශක්තිය ඉහළ නැංවීමට හේතු වූවත්, මෙම වර්ධනයේ දිගුකාලීන ස්ථාවරත්වය ඉදිරි ආනයන ඉල්ලුම සහ වෙළෙඳපොළ හැසිරීම මත තීරණය වනු ඇත.