ගාල්ල ප්රදේශයේ ප්රසිද්ධ හෝටලයක සේවය කළ 69 හැවිරිදි කම්කරුවෙකුට සේවය අහිමි කිරීම සහ අවසන් මාසයේ වැටුප නොගෙවීම සම්බන්ධයෙන් ඉදිරිපත් කළ පැමිණිල්ලක් මත සිදු කළ මැදිහත්වීමකින් පසු, ඔහුට ආසන්න වශයෙන් රුපියල් ලක්ෂ 7ක පමණ මුදලක් හිමිවීමට නියමිතව ඇති බව වාර්තා වේ.
අදාළ පුද්ගලයා විසින් මෙම ගැටලුව සම්බන්ධයෙන් ගාල්ල මානව හිමිකම් ප්රථමාධාර මධ්යස්ථානය වෙත පැමිණිල්ලක් ඉදිරිපත් කර ඇති අතර, එම පැමිණිල්ල අනුව කරුණු කම්කරු කාර්යාලය වෙත යොමු කර තිබේ.
අදාළ ගැටලුව සම්බන්ධයෙන් කම්කරු කාර්යාලයේදී පැවති සාකච්ඡා සහ විමර්ශන සඳහා ගාල්ල මානව හිමිකම් ප්රථමාධාර මධ්යස්ථානය නියෝජනය කරමින් එහි නියෝජිතයෙකුද මැදිහත් වී ඇත.
මුලදී ආයතනය පාර්ශ්වයෙන් අදාළ පුද්ගලයා අනියම් කම්කරුවෙකු ලෙස සේවය කර ඇති බවත්, ඔහුගේ සේවා කාලය සීමිත කාලසීමාවකට පමණක් අදාළ වන බවත් කරුණු ඉදිරිපත් කර තිබූ බව සඳහන් වේ.
කෙසේ වෙතත්, අදාළ පුද්ගලයා ඉදිරිපත් කළ තොරතුරු අනුව ඔහු එම ආයතනයේ දීර්ඝ කාලයක් සේවය කර ඇති බවට සැකයක් මතුවීම හේතුවෙන් ඒ සම්බන්ධයෙන් වැඩිදුර කරුණු සොයා බැලීමට පියවර ගෙන තිබේ.
එහිදී ආයතනය විසින් සඳහන් කර තිබූ සේවා කාලය 2019 වසරේ මාස කිහිපයක් සහ 2023, 2024 හා 2025 වසරවල මාස කිහිපයක් ලෙස දැක්වුණද, සොයාගත් තොරතුරු අනුව අදාළ පුද්ගලයා 2015 සහ 2016 වසරවල සිටම එම ආයතනයේ සේවය කර ඇති බවට කරුණු අනාවරණය වී ඇතැයි සඳහන් වේ.
ඔහු යම් යම් කාලසීමාවන්හිදී සේවයෙන් ඉවත්ව ගොස් පසුව නැවත සේවයට වාර්තා කර ඇති බවද අනාවරණය වී තිබේ.
මේ අතර, අදාළ සේවා කාලසීමාවන් සම්බන්ධයෙන් තවත් වැදගත් කරුණක් ලෙස සේවක අර්ථසාධක අරමුදලට (EPF) අදාළ ගෙවීම් පිළිබඳවද අවධානය යොමු වී ඇත.
ආයතනය විසින් ඇතැම් කාලසීමාවන් සඳහා EPF මුදල් තැන්පත් කර තිබුණද, ඇතැම් කාලසීමාවන් සඳහා එම ගෙවීම් සිදුකර නොතිබීම හේතුවෙන් අදාළ සේවකයාට හිමිවිය යුතු ප්රතිලාභ අහිමි වී ඇති බවට කරුණු අනාවරණය වී තිබේ.
කම්කරු කාර්යාලයේ පැවති දීර්ඝ සාකච්ඡා සහ කරුණු සොයා බැලීම්වලින් අනතුරුව, අදාළ පුද්ගලයාට හිමිවිය යුතු මුදල් සහ ඒ සඳහා අදාළ දඩ මුදල්ද සමඟ ආසන්න වශයෙන් රුපියල් ලක්ෂ 7ක පමණ මුදලක් ලබාදීමට නියමිතව ඇති බව සඳහන් වේ.
ඒ අනුව, මුලදී රුපියල් 11,400ක පමණ දීමනාවක් ලෙස අවසන් වීමට ඉඩ තිබූ මෙම ගැටලුව, සේවා කාලය සහ EPF හිමිකම් සම්බන්ධයෙන් සිදු කළ වැඩිදුර කරුණු සොයා බැලීම හා මැදිහත්වීම හේතුවෙන් රුපියල් ලක්ෂ 7ක පමණ හිමිකමක් දක්වා වර්ධනය වී තිබේ.
මෙම සිද්ධියෙන් සේවකයන්ගේ සේවා කාලය, EPF ගෙවීම් සහ අනෙකුත් කම්කරු අයිතිවාසිකම් පිළිබඳ නිසි අවධානයක් යොමු කිරීමේ වැදගත්කමද පෙන්වා දෙයි.