රජයට ගෙවන ලෙස ශ්‍රේෂ්ඨාධිකරණය නියම කළ රුපියල් මිලියන 275ක මුදල සම්බන්ධයෙන් අධිකරණ නියෝග ක්‍රියාත්මක නොකළ බවට චෝදනා කරමින් ගොනු කළ අධිකරණයට අපහාස කිරීමේ පෙත්සමෙන් අනතුරුව, හිටපු සෞඛ්‍ය අමාත්‍ය කෙහෙළිය රඹුක්වැල්ල ඇතුළු හිටපු ජ්‍යෙෂ්ඨ සෞඛ්‍ය නිලධාරීන් සිව්දෙනාට හිඟ මුදල් ගෙවීම සඳහා කාලසීමා නියම කරමින් විදේශ ගමන් තහනම් පැනවීමට ශ්‍රේෂ්ඨාධිකරණය පියවර ගෙන තිබේ.
ඖෂධ ප්‍රසම්පාදන සිද්ධියට අදාළව ලබාදුන් ශ්‍රේෂ්ඨාධිකරණ තීන්දුව ක්‍රියාත්මක නොකිරීම සම්බන්ධයෙන් ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය විසින් ඔක්තෝබර් 12 වැනිදා මෙම පෙත්සම ගොනු කර තිබිණි. අධිකරණ නියෝග හිතාමතා පැහැර හැරීම සම්බන්ධයෙන් අදාළ පාර්ශ්වවල වගවීම තහවුරු කිරීම එහි අරමුණ විය.
2026 මාර්තු 27 වැනිදා ලබාදුන් තීන්දුවෙන්, වගඋත්තරකරුවන් පස්දෙනා ආණ්ඩුක්‍රම ව්‍යවස්ථාවේ 12(1) වගන්තිය යටතේ සහතික කර ඇති නීතිය හමුවේ සමාන ආරක්ෂාව ලැබීමේ මූලික අයිතිවාසිකම උල්ලංඝනය කර ඇති බව ශ්‍රේෂ්ඨාධිකරණය තීන්දු කර තිබිණි. ඒ අනුව, කෙහෙළිය රඹුක්වැල්ලට රුපියල් මිලියන 75ක් ද, අනෙක් නිලධාරීන් සිව්දෙනාට රුපියල් මිලියන 50 බැගින් ද රජයට ගෙවන ලෙස නියෝග කර තිබුණි.
ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය නිකුත් කළ නිවේදනයට අනුව, හිටපු නිලධාරීන් කිහිපදෙනෙකු අදාළ මුදල් ගෙවීම සඳහා නව කාලසීමා ඉල්ලා ඇති අතර, එක් නිලධාරියෙකු තමන්ට නියම කළ සම්පූර්ණ මුදල දැනටමත් ගෙවා අවසන් කර තිබේ.
ජාතික ඖෂධ නියාමන අධිකාරියේ හිටපු සභාපති මහාචාර්ය එස්. ඩී. ජයරත්න තමන්ට නියම කළ රුපියල් මිලියන 50ක මුදල ඔක්තෝබර් 22 වැනිදා සම්පූර්ණයෙන් ගෙවා අවසන් කළ බව අධිකරණයට දැනුම් දී තිබේ.
හිටපු අමාත්‍ය කෙහෙළිය රඹුක්වැල්ල ඔක්තෝබර් 23 වැනිදා රුපියල් මිලියන 20ක් ගෙවා ඇති අතර, ඉතිරි රුපියල් මිලියන 55 සති දෙකක් ඇතුළත ගෙවා නිම කරන බවට පොරොන්දු වී ඇත.
සෞඛ්‍ය අමාත්‍යාංශයේ හිටපු ලේකම් එස්. ජේ. එස්. චන්ද්‍රගුප්ත සතියක් ඇතුළත රුපියල් මිලියන 5ක් ද, ඉතිරි රුපියල් මිලියන 45 මාස තුනක් ඇතුළත ද ගෙවීමට එකඟ වී තිබේ.
ජාතික ඖෂධ නියාමන අධිකාරියේ හිටපු ප්‍රධාන විධායක නිලධාරී වෛද්‍ය විජිත් ගුණසේකර සති දෙකක් ඇතුළත රුපියල් මිලියන 20ක් ද, ඉතිරි රුපියල් මිලියන 30 මාස තුනක් ඇතුළත ද ගෙවීමට එකඟ වී ඇත.
වෛද්‍ය සැපයුම් අංශයේ හිටපු අධ්‍යක්ෂ වෛද්‍ය ඒ. තුසිත සුදර්ශන තම ඉතිරිකිරීම්වලින් රුපියල් මිලියන 2කට ආසන්න මුදලක් සතියක් ඇතුළත ගෙවීමටත්, ඉතිරි රුපියල් මිලියන 48 මාස තුනක් ඇතුළත ගෙවා අවසන් කිරීමටත් පොරොන්දු වී තිබේ.
අධිකරණය විසින් අදාළ නිලධාරීන්ට හිඟ මුදල් මාස තුනක් ඇතුළත ගෙවා නිම කරන ලෙස නියෝග කර ඇති අතර, විදේශ ගමන් තහනම් පැනවීමට ද පියවර ගෙන ඇත. එක් එක් වගඋත්තරකරු රුපියල් මිලියන 50ක මුදල් ඇපයක් සහ ශරීර ඇපකරුවන් දෙදෙනෙකු බැගින් වූ කොන්දේසි යටතේ ඇප මත මුදාහැරීමට ද නියෝග කර තිබේ.
මේ සම්බන්ධයෙන් අදහස් දක්වමින් ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය අවධාරණය කරන්නේ, අධිකරණ නියෝගවලට අනුකූලව කටයුතු කිරීම නීතියේ ආධිපත්‍යය සහ ව්‍යවස්ථාපිත වගවීම තහවුරු කිරීම සඳහා අත්‍යවශ්‍ය වන බවයි. අධිකරණ නියෝග ක්‍රියාත්මක කරවා ගැනීම සඳහා පෙත්සම්කරුවන්ට නැවත නැවතත් අධිකරණය හමුවට යාමට සිදුවීම සාමාන්‍ය තත්ත්වයක් නොවිය යුතු බව ද එම ආයතනය පෙන්වා දෙයි.
දූෂණ හා වංචා සම්බන්ධ ක්‍රියාවලට දීර්ඝකාලීන නෛතික ප්‍රතිවිපාක මෙන්ම කීර්තිනාමයට හානි සිදුවිය හැකි බව සඳහන් කරන එම සංවිධානය, රාජ්‍ය නිලධාරීන්ගේ ක්‍රියාකලාප නිරීක්ෂණය කරමින් වගවීම තහවුරු කිරීම සඳහා අඛණ්ඩව කටයුතු කරන බව ද වැඩිදුරටත් සඳහන් කරයි.
අදාළ නඩුව 2027 පෙබරවාරි 15 වැනිදා යළි කැඳවීමට නියමිතය.