සාමණේර හිමිනමකට බරපතළ ලිංගික අපයෝජනයක් සිදු කිරීම සම්බන්ධයෙන් වරදකරු කර වසර 10ක බරපතළ වැඩ සහිත සිරදඬුවම් නියම කර සිටි බෞද්ධ භික්ෂුවක විසින් ගොනු කර තිබූ අභියාචනයක් අභියාචනාධිකරණය විසින් නිෂ්ප්‍රභ කර තිබේ.
ඒ අනුව, පොළොන්නරුව මහාධිකරණය විසින් අදාළ භික්ෂුව වරදකරු කරමින් ලබා දුන් තීන්දුව සහ නියම කළ දඬුවම අභියාචනාධිකරණය විසින් තහවුරු කර ඇත.
විනිසුරු අමල් රණරාජ සහ ආචාර්ය සුමුදු ප්‍රේමචන්ද්‍ර යන මහත්වරුන්ගෙන් සමන්විත විනිසුරු මඬුල්ලක් විසින් මෙම තීන්දුව ලබා දී තිබේ.
දණ්ඩ නීති සංග්‍රහයේ 365B(2)(b) වගන්තිය යටතේ බරපතළ ලිංගික අපයෝජන චෝදනා දෙකකට අදාළව මෙම භික්ෂුව පොළොන්නරුව මහාධිකරණය විසින් වරදකරු කරනු ලැබ තිබිණි. අධිකරණ වාර්තාවලට අනුව, අදාළ සිදුවීම් සිදුවූ බවට චෝදනා එල්ල වී ඇත්තේ 2014 නොවැම්බර් 23 සහ 2015 ජනවාරි 23 යන දිනවලදීය. එවකට වින්දිත සාමණේර හිමිනම හත් හැවිරිදි වියේ පසුවූ අතර, ඔහු චූදිත භික්ෂුව වැඩසිටි විහාරස්ථානයේ නේවාසිකව සිට ඇත.
නඩු විභාගයෙන් අනතුරුව එක් චෝදනාවකට වසර 10 බැගින් බරපතළ වැඩ සහිත සිරදඬුවම් නියම කර තිබූ අතර, එම සිරදඬුවම් සමගාමීව ගෙවී යා යුතු බවට මහාධිකරණය නියෝග කර තිබිණි. මීට අමතරව, එක් චෝදනාවකට රුපියල් 50,000 බැගින් දඩ නියම කර තිබූ අතර, වින්දිතයාට රුපියල් 100,000ක වන්දියක් ගෙවන ලෙස ද නියෝග කර තිබුණි.
කෙසේ වෙතත්, තමන් වරදකරු කිරීම සහ දඬුවම් නියම කිරීම අභියෝගයට ලක් කරමින් චූදිත භික්ෂුව අභියාචනාධිකරණය හමුවේ අභියාචනයක් ගොනු කර තිබිණි.
එම අභියාචනය සලකා බැලීමේදී වින්දිතයා ලබාදුන් සාක්ෂිය සවිස්තරාත්මක මෙන්ම ස්ථාවර එකක් බව අභියාචනාධිකරණය නිරීක්ෂණය කර ඇත. හරස් ප්‍රශ්න ඇසීමේදී මතු වූ පරස්පරතා ප්‍රධාන ලිංගික අපයෝජන චෝදනාවලට අදාළ නොවන බව ද විනිසුරු මඬුල්ල පෙන්වා දී තිබේ.
ළමා වින්දිතයාගේ සාක්ෂිය විශ්වාසදායක සහ සත්‍ය බවට තහවුරු වූ පසු, එම සාක්ෂි මත පදනම්ව තීන්දුවක් ලබාදීමට නඩු විභාගය පැවැත්වූ විනිසුරුවරයාට හැකියාව පවතින බව ද අභියාචනාධිකරණය අවධාරණය කර ඇත.
නීතිපතිවරයා වෙනුවෙන් අතිරේක සොලිසිටර් ජනරාල් ශනිල් කුලරත්න මහතා අධිකරණය හමුවේ පෙනී සිටියේය.
(මුලාශ්‍රය What News )