මෙම වසරේ මුල් මාස නවය ඇතුළත ළමයින්ට සිදුවූ ලිංගික අපයෝජන පිළිබඳ පැමිණිලි 364 ක් ලැබී ඇති බව ජාතික ළමාරක්ෂක අධිකාරිය (NCPA) පවසයි. ඊට අමතරව, එම කාලසීමාව තුළම බරපතල ලිංගික අපයෝජනවලට අදාළ පැමිණිලි 114 ක් ද වාර්තා වී ඇත. සමස්තයක් වශයෙන්, ළමා අපයෝජන සහ ළමයින් සම්බන්ධ වෙනත් ගැටලු පිළිබඳව පැමිණිලි 9,613 ක් ජාතික ළමාරක්ෂක අධිකාරිය වෙත ලැබී ඇති අතර, ඉන් වැඩිම පැමිණිලි සංඛ්‍යාව වන පැමිණිලි 1,554 ක් වාර්තා වී ඇත්තේ සැප්තැම්බර් මාසයේදී ය.
ලැබී ඇති පැමිණිලි අතර ස්ත්‍රී දූෂණ සිදුවීම් 169 ක්, ලිංගික සූරාකෑම් සිදුවීම් 8 ක්, ළමුන් ජාවාරම් කිරීමට අදාළ සිදුවීම් 40 ක්, මත්ද්‍රව්‍ය ජාවාරම් සඳහා ළමුන් යොදාගැනීමේ සිදුවීම් 37 ක් සහ ළමයින්ට සිදුකළ කෲරත්වයන් පිළිබඳ පැමිණිලි 1,889 ක් ඇතුළත් වේ. තවද, මෙම කාල සීමාව තුළ යොවුන් වියේ ගැබ්ගැනීම් සම්බන්ධයෙන් පැමිණිලි 51 ක්, ළමා විවාහ පිළිබඳ පැමිණිලි 9 ක් සහ මත්ද්‍රව්‍ය වරදවලට අදාළ පැමිණිලි 99 ක් ද ජාතික ළමාරක්ෂක අධිකාරිය වෙත යොමු කර ඇත.
මීට අමතරව, මෙම මුල් මාස නවය තුළදී ළමයින්ට එරෙහිව සිදුවූ සයිබර් ප්‍රචණ්ඩත්වයන් පිළිබඳ පැමිණිලි 196 ක් සහ ගෘහස්ථ ප්‍රචණ්ඩත්වයන්ට අදාළ පැමිණිලි 46 ක් ද වාර්තා වී ඇති බව ජාතික ළමාරක්ෂක අධිකාරිය වැඩිදුරටත් සඳහන් කරයි.