කෑගල්ල දිස්ත්රික්කයේ මාවනැල්ල ප්රාදේශීය ලේකම් කොට්ඨාසයට අයත් හිඟුල ප්රදේශයේ පදිංචි මොහොමඩ් රාසික් සහ ෆාතිමා රාලියා යන දෙදෙනාගේ සිව් හැවිරිදි දියණිය වන ෆාතිමා රහිෂා දැරිය පසුගිය අගෝස්තු 13 වැනිදා වත්තේගම පොලිස් බල ප්රදේශයේ මහමග අතහැර දමා සිටියදී පොලිසිය විසින් සොයාගෙන තිබේ.
ගම්වාසීන්ගෙන් ලද තොරතුරක් මත වත්තේගම පොලිසියේ නිලධාරීන් විසින් දැරිය බේරාගෙන වත්තේගම රෝහල වෙත ඇතුළත් කිරීමට කටයුතු කර තිබුණි.
කෙසේ වෙතත්, දැරිය මහමගට පැමිණීමට පෙර ඇය මුහුණ දී ඇති බව කියන අමානුෂික වධහිංසා පිළිබඳ තොරතුරු අනාවරණය වීමත් සමඟ මෙම සිද්ධිය සම්බන්ධයෙන් දැඩි අවධානයක් යොමුව තිබේ.
දැරියගේ පියා සඳහන් කරන ආකාරයට, මව විසින් වෙනත් පුද්ගලයෙකු සමඟ පවත්වාගෙන ගිය බව කියන සම්බන්ධතාවයක් හේතුවෙන් මව සහ පියා අතර අවස්ථා කිහිපයකදී ගැටලු ඇතිව තිබූ අතර, ඒ සම්බන්ධයෙන් මාවනැල්ල පොලිසියද විමර්ශනයක් සිදුකර තිබේ.
පසුව මව විසින් දැරියද රැගෙන වෙනත් ප්රදේශයකට ගොස් ඇති අතර, එම කාලය තුළ දැරියට අමානුෂික ලෙස සැලකෙන බවට පියාට තොරතුරු ලැබී ඇතැයි සඳහන් වේ.
ඒ අනුව, දැරිය සම්බන්ධයෙන් පියා විසින් 2026 අගෝස්තු 4 වැනිදා මාවනැල්ල පොලිසියට පැමිණිල්ලක් ඉදිරිපත් කර තිබූ බවද ඔහු පවසයි.
පියාගේ ප්රකාශයට අනුව, එම පැමිණිල්ල සම්බන්ධයෙන් විමර්ශන සිදුකර තිබුණද, එදින දැරිය පියා වෙත රැගෙන ඒමට නොහැකි වී ඇත. දැරිය ලිඛිත ගිවිසුමක් මගින් පියාට භාරදීමට මව සූදානම් බව ප්රකාශ කර තිබුණද, එලෙස දැරිය භාරදිය නොහැකි බවත් අධිකරණයක් හෝ කාදි අධිකරණයක් මගින් අවශ්ය කටයුතු සිදුකළ යුතු බවත් පොලිසිය ප්රකාශ කළ බව පියා සඳහන් කරයි.
එම කාලය අතරතුරදී දැරියගේ සිරුරට පිළිස්සුම් තුවාල සිදුකර ඇති බවත්, කෙස්වලින් අල්ලා බිත්තියක ගැසීම හේතුවෙන් බරපතළ තුවාල සිදුව ඇති බවත් අනාවරණය වී තිබේ. එහි ප්රතිඵලයක් ලෙස දැරියගේ දත් කිහිපයක් අහිමි වී ඇති බවද සඳහන්ය.
බරපතළ තුවාල හේතුවෙන් දැරිය මහනුවර රෝහලේදී ශල්යකර්මවලටද භාජනය කර ඇති බව වාර්තා වේ.
දැරියගේ මව සහ සුළු පියා මත්ද්රව්ය භාවිතයට ඇබ්බැහිව සිටින බවටද තොරතුරු පවතින අතර, ඔවුන් විසින් දැරියට අමානුෂික ලෙස වධහිංසා සිදුකර ඇති බවට චෝදනා එල්ල වී තිබේ.
“කලින් පියවර ගත්තා නම් මේ දේ වළක්වාගත හැකිව තිබුණා
දැරිය සම්බන්ධයෙන් තමන් විසින් අගෝස්තු 4 වැනිදා පොලිසියට පැමිණිල්ලක් ඉදිරිපත් කළ බව පෙන්වා දෙන පියා පවසන්නේ, එම පැමිණිල්ල සම්බන්ධයෙන් කඩිනම් ක්රියාමාර්ගයක් ගෙන තිබුණේ නම් තම දියණියට මෙවැනි අවාසනාවන්ත තත්ත්වයකට මුහුණදීමට සිදු නොවීමට ඉඩ තිබූ බවයි.
මේ වනවිට දැරිය රෝහල් ප්රතිකාරවලින් අනතුරුව Pearls of Paradise Orphanage ළමා නිවාසයේ සුරක්ෂිතව සිටින බව එහි පාලනාධිකාරිය සඳහන් කර තිබේ.
දැරියගේ පිළිස්සුම් තුවාල හේතුවෙන් ඇයගේ එක් ඇසකටද බලපෑම් සිදුව ඇති අතර, ඒ සඳහා ඉදිරියේදී විශේෂ වෛද්ය ප්රතිකාර සඳහා යොමු කිරීමට නියමිත බවද සඳහන්ය.
දරුවන්ගේ ආරක්ෂාව පිළිබඳ වගකීම කාගේද?
සිව් හැවිරිදි දැරියකට සිදුව ඇති බව කියන මෙම අමානුෂික සිදුවීම, ළමා ආරක්ෂාව සම්බන්ධයෙන් වගකිව යුතු සියලු පාර්ශ්වයන්ගේ අවධානය යොමු කළ යුතු බරපතළ කරුණකි.
දරුවෙකු සම්බන්ධයෙන් අවදානම් තත්ත්වයක් පිළිබඳ පැමිණිල්ලක් ලැබුණු අවස්ථාවක එය කඩිනමින් විමර්ශනය කර දරුවාගේ ආරක්ෂාව තහවුරු කිරීම අතිශය වැදගත් වේ. විශේෂයෙන්ම පවුල් ආරවුල්, මත්ද්රව්ය භාවිතය සහ ළමා හිංසනය පිළිබඳ තොරතුරු එකට මතුවන අවස්ථාවලදී දරුවාගේ ආරක්ෂාව ප්රමුඛතාවක් විය යුතුය.
මෙවැනි දරුවන් තවත් බොහෝ දෙනෙකු සමාජයේ නිහඬව පීඩා විඳිමින් සිටිය හැකි බැවින්, ග්රාම නිලධාරී වසම් මට්ටමේ සිටම අවදානමට ලක්විය හැකි දරුවන් පිළිබඳ අවධානය වැඩි කිරීම අවශ්ය වේ.
එමෙන්ම, පොලිසිය, ජාතික ළමා ආරක්ෂක අධිකාරිය සහ අනෙකුත් අදාළ ආයතන මෙවැනි සිද්ධීන් සම්බන්ධයෙන් කඩිනම් හා පුළුල් විමර්ශන සිදුකර, දරුවන්ගේ ආරක්ෂාව තහවුරු කිරීමට සහ වගකිව යුතු පුද්ගලයන් සම්බන්ධයෙන් නීතිය ක්රියාත්මක කිරීමට කටයුතු කරනු ඇතැයි අපේක්ෂා කෙරේ.
අවසානයේ, මහමග අසරණව සිටියදී දැරියගේ ජීවිතය බේරාගෙන වෛද්ය ප්රතිකාර සඳහා යොමු කර, ඇයට ආරක්ෂිත ස්ථානයක් ලබාදීමට කටයුතු කළ වත්තේගම පොලිසියේ නිලධාරීන්ගේ මැදිහත්වීම අගය කළ යුතුය. අත්හැර දැමූ ස්ථානයෙන් බේරාගත් මේ පුංචි දැරියගේ ඉදිරි ජීවිතය, මෙතැන් සිට ආදරය, රැකවරණය සහ බලාපොරොත්තුව පිරුණු මාවතක් බවට පත්වීම සමාජයේම වගකීමකි.
පසුගිය කාලයේ සමාජ මාධ්ය හරහා පළ කෙරුණු මෙම දැරියගේ සිදුවීම සම්බන්ධයෙන් කෑගල්ල මානව හිමිකම් ප්රථමාධාර මධ්යස්ථානයෙන් ද මැදිහැත් වීමක් සිදු කොට තිබු ඇති අතර ඔවුන් විසින් දැනුවත් වූ කරුණු මත මෙම ප්රවෘත්තිය සකස් කොට ඇත.
ඔබ හෝ ඔබ දන්නා පුද්ගලයෙකු මෙවැනි මානව හිමිකම් උල්ලංඝනයකට හෝ යම් අගතියකට ලක්ව ඇත්නම්, ඒ සම්බන්ධයෙන් නීති ආධාර ලබා ගැනීමට අවශ්ය නම්, ඔබට ආසන්නයේ පිහිටි මානව හිමිකම් ප්රථමාධාර මධ්යස්ථානයක් සමඟ සම්බන්ධ විය හැකිය.
කෑගල්ල අවට සිදුවන මානව හිමිකම් උල්ලංඝනයන් සම්බන්ධයෙන් නීති ආධාර ලබා ගැනීම සඳහා
කෑගල්ල මානව හිමිකම් ප්රථමාධාර මධ්යස්ථානය 074 115 9304
එසේත් නැතිනම්,
රයිට් ටු ලයිෆ් මානව හිමිකම් මධ්යස්ථානය
011 266 9100