බංගලාදේශයේ ඩකා අගනුවර විශ්වවිද්‍යාල ශිෂ්‍ය ගැටුමකින් එක් සිසුවෙකු ජීවිතක්ෂයට පත්වී ඇතැයි එරට මාධ්‍ය ඊයේ වාර්තා කළේය. එම සිසුවා මියගොස් ඇත්තේ පෙරේදා රාත්‍රී එම විශ්වවිද්‍යාලයේ දේශන ශාලාවක් තුළ සිදුවූ පහරදීමකින් බවත්, ඝාතනයට සැකපිට තවත් සරසවි සිසුන් තිදෙ‍ෙනකු අත්අඩංගුවට ගෙන ඇතැයි එරට මාධ්‍ය වාර්තා කළේය. එසේ අත්අඩංගුවට පත්වූ එක් සිසුවකු ඩකා විශ්වවිද්‍යාලයේ විද්‍යා හා තාක්ෂණ විද්‍යා පීඨ ශිෂ්‍ය සංගමයේ උප ලේකම් බව එරට මාධ්‍ය වාර්තා කර තිබුනි.
මේ අතර, වැඩි වැටුප්, ප්‍රසාද දීමනා ඉහළ දමන ලෙස පාලනාධිකාරියට බල කරමින් ඇඟලුම් සේවක සේවිකාවන් විසින් සිදු කරනු ලැබූ වැඩ වර්ජනය හා විරෝධතාව හේතුවෙන් වසා දමනු ලැබූ ඇඟලුම් කර්මාන්තශාලා අතුරින් 27ක් මෙතෙක් නැවත විවෘත කර නැති බව එරට මාධ්‍ය වාර්තා කළේය. පසුගිය සතියේදී සේවක විරෝධතා උත්සන්න වීම හේතුවෙන් වසා දමනු ලැබූ ඇඟලුම් ආයතන 200කට ආසන්න සංඛ්‍යාවක් නැවත විවෘත කර ඇතැයි ද එරට මාධ්‍ය වැඩිදුරටත් වාර්තා කළේය.
මේ වනවිටත් වසා දමා ඇති එම ඇඟලුම් ආයතන අතුරින් 16ක්ම වසා ඇත්තේ දින නියමකින් තොරව බවත්, බංග්ලාදේශ කම්කරු පනතට අනුව වැටුප් රහිත කාලසීමාවකට වසා දමා ඇති බැවින් එහි සේවක සේවිකාවන් කෝපයට පත්ව සිටින බවත් වාර්තා වේ.
පසුගියදා ඇඟලුම් ආයතන ඇතුළු කර්මාන්තශාලා 219ක් වසා දැමීමට එහි පාලනාධිකාරිය පියවර ගෙන තිබු අතර, ඉන් 86ක්ම දින නියමයකින් තොරව වසා දැමීමට පියවර ගෙන තිබිණි. විරෝධතා වැළැක්වීම සඳහා තවත් කර්මාන්ත ශාලා 133ක සේවක සේවිකාවන්ට නිවාඩු ලබාදීමට පාලනාධිකාරිය පියවර ගෙන තිබූ බව ද වාර්තා විය.
මේ අතර, අන්තර්වාර රජය බලයට පත්වී මාසයකට අධික කාලයක් ගතවූවද, මෙතෙක් මහමැතිවරණ පිළිබඳ කිසිදු ප්‍රකාශයක් නිකුත් කිරීමට අසමත්වීම අභියෝගයට ලක් කරමින් බංග්ලාදේශ ජාතිකවාදී පක්ෂය ඩකා අගනුවර දැවැන්ත විරෝධතාවක නිරත වූ බව එරට මාධ්‍ය වාර්තා කළේය.
වහාම ක්‍රියාත්මක වන පරිදි මහමැතිවරණයක් කැඳවා රටේ ප්‍රජාතන්ත්‍රවාදය ස්ථාපිත කිරීමට පියවර ගන්නා ලෙස කලීඩා සියාගේ නායකත්වයෙන් යුතු එම පක්ෂය අන්තර්වාර රජයේ ප්‍රධාන උපදේශක මහාචාර්ය මොහොමඩ් යූනුස්ට බල කර සිටි බවත් එරට මාධ්‍ය වැඩිදුරටත් වාර්තා කළේය.
ඩකා අගනුවර පිහිටි බංග්ලාදේශ ජාතිකවාදී පක්ෂ මූලස්ථානය ඉදිරිපිට රැස්වූ දහස් සංඛ්‍යාත පාක්ෂිකයන් එම විරෝධතාවේ නිරතව ඇති අතර, රටේ ආර්ථිකය මෙතෙක් ස්ථාවර කිරීමට අසමත්වීම පිළිබඳ අන්තර්වාර රජයට චෝදනා කර ඇතැයි ද වාර්තා වේ.