දිවයිනට බලපා ඇති වියළි කාලගුණික තත්ත්වය හේතුවෙන් හානියට පත්ව ඇති වී හා බඩඉරිඟු ඇතුළු භෝග වර්ග 06ක් සඳහා හෙක්ටයාරයකට රුපියල් ලක්ෂය බැගින් වන්දි මුදල් ගෙවීමට රජය තීරණය කරයි. ඒ අනුව මෙම වන්දි ගෙවන්නේ උපරිම අක්කර 05ක් සඳහා පමණි.
මොනරාගල, පොලොන්නරුව, හම්බන්තොට, අම්පාර, අනුරාධපුර ආදී දිස්ත්රික්කවල වී, බඩඉරිඟු ඇතුළු වගාවන්ට මේ වන විට හානි සිදුවී ඇති බව ගොවිජන රක්ෂණ මණ්ඩලයට වාර්තා වී ඇත.
වී වගාවට අදාළව මොනරාගල ගොවීන් 960කගේ අක්කර 1,334ක්, පොලොන්නරුවේ ගොවීන් 560කගේ අක්කර 1100ක්, හම්බන්තොට ගොවීන් 782කගේ අක්කර 435ක්, අම්පාරේ ගොවීන් 505කගේ අක්කර 1004ක්, අනුරාධපුර ගොවීන් 1900කගේ අක්කර 2200ක් යනාදී වශයෙන් කුඹුරු ඉඩම් හානියට පත්ව තිබේ.
ඒ අනුව කෘෂිකාර්මික හා ගොවිජන රක්ෂණ මණ්ඩලයෙහි නිලධාරීන් මෙම දිස්ත්රික්කවල හානියට පත් කුඹුරු ඉඩම්වලට ගොස් හානි පරීක්ෂා කිරීමේ කටයුතු ආරම්භ කර ඇත.
මෙම තත්ත්වය යටතේ ඉහත දිස්ත්රික්කවලින් මේ වන විට හානියට පත් කුඹුරු අක්කර 6,073ක ගොවි මහතුන් 4707කට ආසන්න පිරිසකට කඩිනමින් වන්දි මුදල් නිදහස් කිරීමට කෘෂිකාර්මික හා ගොවිජන රක්ෂණ මණ්ඩලය කරමින් සිටියි.
මෙම නියං තත්ත්වය යටතේ ජලය හිඟකම හේතුවෙන් වී, බඩඉරිඟු ඇතුළු වගා හානියට පත්ව ඇත්නම්, හැකි ඉක්මනින් කෘෂිකාර්මික හා ගොවිජන රක්ෂණ මණ්ඩලයේ ක්ෂේත්ර නිලධාරීන් හමුවී තම හානිය දැනුම් දිය යුතු අතර, එසේ නොමැති නම් ගොවිජන සංවර්ධන මධ්යස්ථානවල පවත්වාගෙන යන හානි දැනුම්දීමේ ලේඛනයෙහි වගා හානිය සටහන් කිරීම ගොවි මහතුන් විසින් කළ යුතුව ඇති බවද මණ්ඩලය සඳහන් කරයි.
කෘෂිකාර්මික හා ගොවිජන රක්ෂණ මණ්ඩලයේ 1918 යන කෙටි ඇමතුම් අංකය මඟින් මේ සම්බන්ධයෙන් ගොවි මහතුන්ට වැඩිදුර තොරතුරු අසා දැනගැනීමේ හැකියාව පවතී.
වන්දි ගෙවීම් කඩිනම් කර ගොවීන්ට සිදුව ඇති වගා හානි ආවරණය කරන ලෙස කෘෂිකර්ම, පශු සම්පත් ඉඩම් හා වාරිමාර්ග ඇමැති කේ.ඩී. ලාල්කාන්ත මහතා ද උපදෙස් දී ඇත.
උපුටා ගැනීම දිනමිණ