එලෙස අත්අඩංගුවට ගෙන ඇත්තේ, නිට්ටඹුවේ පදිංචි 22 හැවිරිදි පසුවන මොහොමඩ් රුෂ්ඩි නමැති තරුණයෙකි.
මාර්තු 22 වන දා අදාළ තරුණයා අත්අඩංගුවට ගෙන ඇති අතර, පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධිය මනතුංග සඳහන් කළේ, “F*** Israel” යනුවෙන් සඳහන් ස්ටිකරයක් ඇලවීමේ සිද්ධියක් සම්බන්ධයෙන් සිදුකරන ලද විමර්ශනවල දී ඔහු පිළිබඳව අනාවරණය වූ වෙනත් කරුණු මත අදාළ අත්අඩංගුවට ගැනීම සිදු කළ බව ය.
“ස්ටිකර් සම්බන්ධ හේතුව නිසා අපි බැලුවා මෙයා කවුද කියලා. ඒ බලනකොට මෙයා එක්ස්ට්‍රිමිස්ට්වලට ගොඩක් කන්වර්ට් වෙලා හිටියේ. අපි එක පාරට ඇරස්ට් කළා නෙවෙයි. ලංකාවේ වෙන තැන්වලත් ස්ටිකර් ඇලෙව්වා. මෙයා ස්ටිකර් ඇලෙව්වා හින්දා අපි මෙයාව කන්සර්න් කළා. එතකොට අපි මෙයාව බලනකොට, මෙයා මේ විධියේ කෙනෙක්. ඊට පස්සේ තමයි මෙයාව මේ විදිහට ඇරස්ට් කරලා ගත්තේ. ස්ටිකර් ඇලෙව්වා හින්ද ගත්තා කියලා හිතන්න එපා. ඇලෙව්වා හින්දා මෙයා ගැන අපි බැලුවා,” පොලිස් මාධ්‍ය ප්‍රකාශකවරයා පැවසීය.
ඔහු සඳහන් කළේ, අදාළ තරුණයා උලමා සභාවට ද ඉදිරිපත් කළ බව ය.
“මේ කියන කෙනාව, උලමා සභාවටත් ඉදිරිපත් කළා. එතකොට ඒ උලමා සභාවෙනුත් ඇත්තට ම කිව්වා මෙයාගේ යම්කිසි සාමාන්‍ය මුස්ලිම් ජාතිකයෙකුට එහා ගිය තත්ත්වයක් තියෙනවා, මෙයාව පුනරුත්ථාපනය කරන්න ඕන කියලා,” ඔහු වැඩිදුරටත් පැවසීය.
රුෂ්ඩි මේ වන විට ත්‍රස්තවාදය වැළැක්විමේ පනත යටතේ දින 90ක රැඳවුම් නියෝග මත ත්‍රස්ත විමර්ශන කොට්ඨාසයේ රඳවා ඇති බව පොලිස් මාධ්‍ය ප්‍රකාශකවරයා තහවුරු කළේ ය.
‘හිතේ වේදනාවට කුණු බාල්දියක ස්ටිකරයක් අලවලා’
රුෂ්ඩි අත්අඩංගුවට ගෙන රඳවා තබා ගැනීම පිළිබඳව ඔහුගේ දෙමව්පියන්ගෙන් විස්තර විමසූ නමුත් සිය පුතුට ඉන් හිරිහැරයක් සිදුවෙතැයි බියෙන් ඔවුහු අදහස් පළ කිරීම ප්‍රතික්ෂේප කළහ.
කෙසේ වෙතත්, ඔහුගේ පවුලේ ඥාතියෙකුගෙන් මේ පිළිබඳව කරුණු විමසූ අතර ඔහුගේ ආරක්ෂාව වෙනුවෙන් ඔහුගේ අනන්‍යතාව අපි හෙළි නොකරන්නෙමු.
ඊශ්‍රායාලය විසින් පලස්තීනයට එල්ල කරනු ලබන ප්‍රහාරවලින් සිදුවන මිනිස් ඝාතනවලට විරෝධය දැක්වීමට රුෂ්ඩි තම සේවා ස්ථානයේ කසළ බඳුනේ ස්ටිකරයක් අලවා ඇතැයි එම ඥාතිවරයා පැවසීය.
ඔහු ඒ පිළිබඳව සිය දෙමාව්පියන්ට ද දන්වා තිබේ.
“අම්මට තාත්තාටත් කියලා තිබුණා, ‘පොඩි ළමයින්ගේ මිනී දකිනකොට මට හරි දුකයි වේදනාවයි. ඒකට මම ස්ටිකරයක් ඇලෙව්වා,’ කියලා. අම්මයි තාත්තයි කියලා තියෙනවා, ‘ඒවා කරන්න යන්න එපා ඒවා ඕනේ නැති වැඩ පල්ලියට ගිහිල්ලා ප්‍රාර්ථනා කරන්න නෝම්බි මාසේ, ඒක තමයි හොඳ දේ,'” යැයි ඔහුට දෙමව්පියන් අවවාද කර ඇතැයි රුෂ්ඩි ගේ පවුලේ ඥාතිවරයා පැවසීය.
මෙම සිදුවීමෙන් පසුව ද රුෂ්ඩි සුපුරුදු පරිදි රැකියාවට ගොස් ඇති අතර ඒ යන අතරතුර මීට දින කිහිපයකට ඉහත දී ඔහු පොලිස් අත්අඩංගුවට පත්ව ඇත.
“එයාව අල්ලා ගත්තාට පස්සේ ගෙදරට කතා කරලා කියලා තියෙනවා, ‘පුතාව අල්ලගෙන තියෙන්නේ. කට උත්තරයක් ගන්න ඕනේ. අම්මයි, තාත්තයි එන්න කට උත්තරයක් අරගෙන රිලීස් කරන්නම්,’ කියලා. මේගොල්ලෝ ගිහිල්ලා තියෙනවා. ඊට පස්සේ මේ කට්ටයත් එක්ක ජීප් එක ආවාලු ගෙදරට. එයා (රුෂ්ඩි) ඉන්න කාමරය චෙක් කෙරුවලු සම්පූර්ණයෙන් ම. ‘සතියකින් රිලීස් කරනවා, සැකයට තමයි තියාගත්තේ,’ කියලා ජීප් එක ගියාලු.”
‘ත්‍රස්තවාදය වැළැක්වීමේ පනත අපගේ අභිලාෂය හෝ ප්‍රතිපත්තිය නොවේ’
“ත්‍රස්තවාදය වැළැක්වීමේ පනත ගැන කිව යුත්තේ, එය අපගේ අභිලාෂය හෝ ප්‍රතිපත්තිය නොවන බවයි. කෙසේ වෙතත්, නව නීතියක් කෙටුම්පත් කරන තුරු, පවතින නීති ඉතා ප්‍රවේශමෙන් භාවිත කළ යුතුයි. රජය නව නීති පනවන තුරු මෙය අවශ්‍යයි,” යනුවෙන් ශ්‍රී ලංකා පලස්තීන සහයෝගීතා කමිටුවේ ද සමාජිකයෙකු වන සභානායක, අමාත්‍ය බිමිල් රත්නායක ජනවාරි මාසයේදී පාර්ලිමේන්තුවේදී පවසා තිබිණි.
බලය ලබා ගැනීමට ඉහත දී ජාතික ජන වේගය ත්‍රස්තවාදය වැළැක්වීමේ පනත අහෝසි කිරීමට මැතිවරණ පොරොන්දු ලබා දී තිබේ.
සැකකරුගේ මානසික තත්ත්වය ගැන පොලිසියේ නිරීක්ෂණය
