බටලන්ද කොමිසන් සභා වාර්තාව පිළිබඳ අලුතින් ඇති වූ විවාදය සහ දේශපාලන ගැටුමේ විපාක පිළිබඳව බොහෝ දෙනා ප්‍රශ්න කරති. එය රනිල් වික්‍රමසිංහ මහතාට බලපාන ආකාරය ගැන මීට පෙර ලිපියක් මගින් සාකච්ඡා කළෙමු. මේ උත්සාහය මාලිමා හෙවත් ජාතික ජන බලවේගයේ ආණ්ඩුව මත එහි බලපෑම පිළිබඳව කෙටියෙන් විග්‍රහයක යෙදීමට ය.
එම වාර්තාව මගින් රනිල් වික්‍රමසිංහ මහතාට එරෙහිව කිසිදු නීතිමය පියවර ගැනීමක් කළ නොහැකි බව පෙර ලිපියෙන් අපි පෙන්වා දුන්නෙමු. නමුත් මාලිමා ආණ්ඩුව කියන්නේ රනිල් දඬු කඳේ ගහන බවකි. මාලිමා ආණ්ඩුව තමන්ට ම වල කපා ගන්නේ මෙබඳු ප්‍රකශ මගින් ය.
පොලොව දෙදරවන චන්ඩි ප්‍රකාශ කරන ආණ්ඩුව එසේ ප්‍රකාශ කරන්නේ ඒවා ක්‍රියාවට නැගීමේ හැකියාව ගැන තක්සේරුවකින් තොරව බව මෑත කාලයේ සිදුවීම් ගණනාවකින් තහවුරු වී ය. හිටපු ජනාධිපති මහින්ද රාජපක්ෂ මහතාගේ සුපිරි නිල නිවෙසින් ඔහු දොට්ට දැමීමේ ප්‍රකාශය එයින් කැපී පෙනෙන සිදුවීමකි.
ඊට පෙර ආණ්ඩුව එබඳු ප්‍රකාශ ගණනාවක් කොට අවසන් වුයේ කී දේ කරගන්නට බැරිව ය. වී මිල දී ගෙන සහල් මාෆියාව මට්ටු කරන්නට කතා කළත් වී මිල දී ගන්නට බැරි වී ය. සහල් මිල පාලනය කරන්නට ගොස් වී නිෂ්පාදනය ද කඩා වට්ටවා ගෙන බව අලුත් ම වාර්තා කියයි.
මත්පැන් බලපත් නිකුත් කිරීම ගැන විශාල චෝදනාවක් කොට පසුව කීවේ ඒවා නීති විරෝධී නැති නිසා කිසිවක් කළ නොහැකි බව යි.
හොරු ඇල්ලීමේ කතා ද පුහු වී තිබේ. දැන් අල්ලපු හොරෙක් නැත. අර්ජුන මහේන්ද්‍රන් ගෙන්වන්නට ද බැරි ය.
බටලන්ද වාර්තාව අනුව රනිල්ට එරෙහිව ක්‍රියා කිරීමේ කයිවාරුවට ද අත්වන්නට නියමිතව ඇත්තේ එම ඉරණම යි. එය මාලිමා ආණ්ඩුව ලබන තවත් දේශපාලන පරාජයකි.
මෙහි අනෙක් බලපෑම නම් ජාතික ජන බලවේගය අමාරුවෙන් ගොඩ නගාගත් දේශපාලන අනන්‍යතාවය විනාශයට පත්වීම යි.
ජනතා විමුක්ති පෙරමුණ තම පක්ෂ අනන්‍යතාවය ඉවත ලා ජාතික ජන බලවේගය ලෙස නව අනන්‍යතාවයක් ගොඩ නගා ගැනීමට ක්‍රියා කළේ පක්ෂ අනන්‍යතාවය මත දේශපාලන බලය ලබා ගැනීම කළ නොහැකි බව තේරුම් ගත් නිසා බව අමුතුවෙන් කිව යුතු නැත. ඒ සඳහා පක්ෂයේ නොවන වෙනත් පිරිස් සම්බන්ධ කර ගැනීමට ද ඔවුහු වෙහෙසී ක්‍රියා කළෝය. ඔවුන්ගේ නව දේශපාලන අනන්‍යතාවය යටතේ නව ආර්ථික දැක්මක් සහ දේශපාලන ක්‍රියාවලියක් ද ඉදිරිපත් කළේ පැරණි පක්ෂ මතවාද යටපත් කරමින් ය.
ජනතා විමුක්ති පෙරමුණට කිසි දා රැස් කරගත නොහැකි පිරිසක් ජාතික ජන බලවේගය වටා එක් රොක් වනු දක්නට ලැබිණි. 88/89 කාලයේ ජවිපෙ ඝාතන ලැයිස්තුවල සිට දිවි බේරාගත් අයත්, ජවිපෙ මර්දනයට රජය සමග සහයෝගයෙන් කටයුතු කළ උදවියත් ජාතික ජන බලවේගයේ වේදිකාවේ දක්නට ලැබිණි.
ජාතික ජන බලවේගය කෙටි කාලෙකින් දැවැන්ත ව්‍යාපාරයක් වී ආණ්ඩු බලය ලබාගන්නේ මෙම නව අනන්‍යතාවය යටතේ ය. ඒ සඳහා ජවිපෙ අනන්‍යතාවය යටපත් කිරීමට සිදුව තිබිණි. ජවිපෙයට තිබෙන ප්‍රචණ්ඩ ,මිනීමරු අතීතය අමතක කරවනු ලැබීය.
බටලන්ද කොමිසන් සභා වාර්තාව පිළිබඳ අලුත් සංවාදය දේශපාලන ලෝකයට කඩා වැටෙන්නේ මෙලෙස නව අනන්‍යතාවයක් ලෙස ඔවුන් රට හමුවේ පෙනී සිටිය දී ය.
බටලන්ද මරාලය කඩා වැටීමත් සමග ආණ්ඩුවේ ඇතැම් නායකයින්ට තමන්ගේ ජාතික ජන බලවේගය යන නව අනන්‍යතාවය අමතක වී ය. බටලන්දට ඔවුන් ප්‍රතිචාර දක්වන්නට වුයේ ජවිපෙ වශයෙනි. ඒ සමග මෙතෙක් යට ගසා තිබුණු ඔවුන්ගේ මිනීමරු අතීතය යළි කරලියට පැමිණියේ ය. ශිෂ්ට මිනිසුන් ලෙස රට ඉදිරියේ ගොඩ නගා තිබු ප්‍රතිරූපය යට කරමින් මතු වුයේ නිරායුධ මිනිසුන් මරා දැමු බිහිසුණු සංවිධානයක ප්‍රතිරූපය යි.
ඔවුන් ඉතා අමාරුවෙන් අලුතින් ගොඩ නැගූ ජාතික ජන බලවේගයේ ප්‍රතිරූපය දැන් සුනු විසුනු වෙමින් පවතියි. එමෙන් ම, ඒ සමග එක් වී සිටි ජවිපෙ නොවන පිරිස් දැන් සිටින්නේ දරුණු ප්‍රතිවිරෝධයකට මැදි වූ තත්ත්වයක ය. නව ප්‍රතිරූපය මත එයට සහය දුන් ජනයා ද දැන් අන්ද මන්ද වී සිටිති.
පෙනෙන විදිහට බටලන්ද මරාලය කඩා වැටීමෙන් ජාතික ජන බලවේගය ලෙස ගොඩ නැගූ නව අනන්‍යතාවය විනාශ වී ගොසින් ය. දැන් යළි තිබෙන්නේ ජනතා විමුක්ති පෙරමුණේ ප්‍රතිරූපය යි.
මෙහි දේශපාලන ප්‍රතිවිපාක ඉදිරි කාලයේ අපට දැකගත හැකි වනු ඇත.