බාලවයස්කාර දැරියකට ලිංගික අපයෝජනයක් සිදුකිරීමේ චෝදනාවට වරදකරු වූ පුද්ගලයකුට කොළඹ මහාධිකරණය විසින් බරපතළ වැඩ සහිත වසර 15 ක සිරදඬුවම් නියම කර ඇත. කොළඹ මහාධිකරණ විනිසුරු නවරත්න මාරසිංහ මහතා විසින් මෙම තීන්දුව ලබා දෙන ලදී. මෙයට අමතරව විත්තිකරුට රුපියල් 75000/-ක දඩයක් නියම කළ මහාධිකරණ විනිසුරුවරයා එකී දඩ මුදල ගෙවීම පැහැර හරිනු ලැබුවොත් අමතරව වසරක ලිහිල් සිරදඬුවම් නියම කරන බවත් තීන්දුවේ සඳහන්ව ඇති බවට වාර්තා වේ.
එමෙන්ම විත්තිකරු විසින් අතවරයට පත් දැරියට ලක්ෂ තුනක වන්දියක් ගෙවිය යුතු බවට නියෝග කළ අතර, එම වන්දි මුදල ගෙවීම පැහැරහැරියහොත් ඊට අමතරව වසරක ලිහිල් සිරදඬුවම් නියම කරන බවත් විනිසුරුවරයා තීන්දු කොට ඇත. මෙසේ දඬුවම් නියම වී ඇත්තේ 59 හැවිරිදි වියේ පසුවන ජංගම එළවළු වෙළෙන්දකුට වන අතර මෙම විත්තිකරු විසින් 2011 වසරේ 09 වැනි වියේ පසුවූ පාසල් දැරියකට ටොපි චොක්ලට් ලබාදී හිතවත්කමක් ඇති කරගෙන ඇය රවටා මෙම ලිංගික අතවරය සිදුකර ඇති බවට නඩු විභාගයේදී අනාවරණය විය.
තීන්දුව ප්‍රකාශයට පත්කරමින් විනිසුරුවරයා කියාසිටියේ මෙය ඉතා බරපතල සිද්ධියක් බවයි. අතවරයට පත් දැරිය සහ අධිකරණ වෛද්‍ය නිලධාරියා විසින් ඉදිරිපත් කළ සාක්ෂි අතර ගැලපීමක් දක්නට තිබෙන බවත් විනිසුරුවරයා සිය තීන්දුවේ පෙන්වාදුන්නේය. විනිසුරුවරයා වැඩිදුරටත් සඳහන් කර සිටියේ මෙවැනි සිද්ධීන් ශිෂ්ඨසම්පන්න සමාජයක් විසින් කිසිසේත්ම අනුමත නොකරන බවත් එය මනූෂ්‍යත්වයට නොගැලපෙන ක්‍රියාවක් බවත් සඳහන් කළ අතර පිළිකුල්සහගත මෙවැනි ක්‍රියාවන් පිළිබඳව සැහැල්ලුවෙන් කටයුතු කිරීමට හැකියාවක් නොමැති බවත්, ඒ අනුව ඔහුට මෙම දඬුවම් නියම කරන බවත් ප්‍රකාශ කළේය.