පියෙකු විසින් සිය බාලවයස්කාර දරුවන් දෙදෙනකුට ලිංගික හිංසන හා අඩත්තේට්ටම් කළ සිදුවීමක් සම්බන්ධයෙන් පොලිස් විමර්ශන නිසියාකාරව සිදු නොවීමෙන් එම දරු දෙදෙනාගේ රැකවරණය සම්බන්ධයෙන් ගැටලුවක් මතුව ඇතැයි නුවරඑළිය රෝහලේ බලධාරීහූ සඳහන් කරති. එමෙන්ම එම දරුවන් සම්බන්ධව ඔවුන්ගේ මිත්තණියක නුවරඑළිය පොලිසියට පැමිණිල්ලක් කර ඇතත් සැකකරු අත්අඩංගුවට ගැනීමට පොලිසිය කටයුතු නොකර ඇති බවට වාර්තා වේ.
ඒ අනුව මෙම දරුවන් වයස අවුරුදු 9ක දියණියක හා අවුරුදු 5ක පුත්‍රයෙක් වන අතර සිය පියාගෙන් ක්‍රෑර අවමන්සහගත සැලකිල්ලට හා ලිංගික අපයෝජනයට ලක්වන බවට ඔවුන් විසින් සිය වැඩිමල් සහෝදරියට (අවුරුදු 10ක) පවසා ඇති අතර ඒ අනුව මිත්තණිය විසින් පොලිස් පැමිණිල්ලක් සිදු කර ඇත.
මෙම දරුවන්ගේ මව පසුගිය වසරේ රැකියාවක් සඳහා විදේශගතව ඇති අතර පියා ස්ථිර රැකියාවක් සිදු නොකරයි. ඒ අනුව මෙම පියා බීමත්ව අවස්ථා ගණනාවකදී දරුවන්ට අඩත්තේට්ටම්වලට ලක්කර ඇති බවට වාර්තා වේ.
පොලිස් පැමිණිල්ලෙන් පසුව දරුවන් පසුගිය 20 වන දා නුවරඑළිය රෝහලට ඇතුළත් කර අධිකරණ වෛද්‍ය නිලධාරිනිය විසින් 21 වන දා ඔවුන් පරීක්ෂාවට කරනු ඇති අතර මේ සම්බන්ධයෙන් නුවරඑළිය පොලිසියෙන් කළ විමසීමකදී එහි නිලධාරියකු පවසා ඇත්තේ සැකකරු අත්අඩංගුවට ගැනීමට දරුවන් සම්බන්ධයෙන් වූ වෛද්‍ය වාර්තා අවශ්‍ය වූවද මේවන තෙක් එම වාර්තා නොලැබුණු බවයි.
මේ සම්බන්ධයෙන් නුවරඑළිය රෝහලෙන් කළ විමසීමේදී වාර්තා වූයේ අධිකරණ වෛද්‍ය පරීක්ෂණ පෝරමය සම්පූර්ණ කර ඇතත් එහි පිටපත පොලිසියෙන් රැගෙන ගොස් නොමැති බවයි. ජාතික ළමා ආරක්ෂක අධිකාරියේ නිලධාරිනියකගෙන් මේ සිද්ධිය සම්බන්ධයෙන් කළ විමසීමක දී පවසා ඇත්තේ මෙම සිදුවීමේ දී වාර්තා වන කරුණු අනුව යුක්තිය පසිඳලීමේ ක්‍රියාවලියේදී දරුවන් ද්විතීයික වින්දිතභාවයට පත් නොකිරීමේ මාර්ගෝපදේශ ක්‍රියාත්මක නොවීමක් නිරීක්ෂණය වන බව ය.