රජයට අයත් වාණිජ නොවන ආයතන ප්‍රතිසංස්කරණය කිරීම පිළිබඳ සොයා බැලීමට කැබිනට් මණ්ඩලය විසින් පත් කරන ලද කමිටුව ඇතැම් රාජ්‍ය ආයතන වසා දැමීම, සහ තවත් ආයතන කිහිපයක් සමඟ රාජ්‍ය මැදිහත්වීම අවසන් කිරීම සහ ඇතැම් ඒවා ඒකාබද්ධ කිරීම ඇතුළු ප්‍රතිව්‍යුහගත කිරීමේ පියවර මාලාවක් නිර්දේශ කර ඇත.
අමාත්‍යාංශ හයක් යටතේ ඇති වාණිජ නොවන රාජ්‍ය ආයතන 12ක් ඒ අනුව ඈවර කිරීමට සහ ශ්‍රී ලංකා මහවැලි අධිකාරිය සහ කජු සංස්ථාව වසා දැමීමට කමිටුව විසින් නිර්දේශ කර ඇත.
එමෙන්ම ගාලු උරුම පදනම, ජාතික සාගර කටයුතු කමිටු ලේකම් කාර්යාලය සහ තොරතුරු හා සන්නිවේදන තාක්ෂණ ඒජන්සිය ඈවර කිරීම ද නිර්දේශ වී ඇති බවට වාර්තා වේ. එමෙන්ම එකී කමිටුව විසින් ශ්‍රී ලංකා ගුවන් විදුලි සංස්ථාව, රූපවාහිනී සංස්ථාව සහ ස්වාධීන රූපවාහිනී ජාලය යන රජයට අයත් මාධ්‍ය ආයතන තුන, කාර්යක්ෂමතාව වැඩි දියුණු කිරීම සහ වාණිජමය වශයෙන් ශක්‍ය කිරීම සඳහා තනි කළමනාකරණයක් යටතේ තැබිය යුතු බවට ද නිර්දේශ කර ඇත.
මෙම මාධ්‍ය ආයතනවලට ඔවුන්ගේ පැවැත්ම සඳහා සැළකිව යුතු ආයෝජනයක් අවශ්‍ය බවත්, එබැවින් තනි කළමනාකරණයක් යටතට පත්කිරීම නිර්දේශ කරන බවත් කමිටුව සඳහන් කර ඇත.ඒකාබද්ධ කිරීම සඳහා නිර්දේශිත අනෙකුත් ආයතන වශයෙන් ශ්‍රී ලංකා තේ මණ්ඩලය සහ කුඩා තේ වතු සංවර්ධන අධිකාරිය මෙන්ම පොල් වගා මණ්ඩලය, පොල් සංවර්ධන අධිකාරිය සහ තල් සංවර්ධන මණ්ඩලය වේ.
රාජ්‍ය සේවා සැපයීම ශක්තිමත් කිරීම සහ ආවේණික අකාර්යක්ෂමතා විසඳීමේ අරමුණින්, රටේ සියලුම වාණිජ නොවන රාජ්‍ය ව්‍යවස්ථාපිත ආයතන සමාලෝචනය කිරීම සඳහා අග්‍රාමාත්‍ය ලේකම් ප්‍රදීප් සපුතන්ත්‍රිගේ ප්‍රධානත්වයෙන් යුත් කමිටුව පසුගිය වසරේ දෙසැම්බර් මාසයේදී පත් කර ඇති අතර එම කමිටුව අමාත්‍යාංශ 24ක් යටතේ ඇති ආයතන160ක් තක්සේරු කර ඇත. අග්‍රාමාත්‍ය හරිනි අමරසූරිය පසුගිය සඳුදා කැබිනට් මණ්ඩලයට මෙම කමිටු වාර්තාව ඉදිරිපත් කළ අතර, එහි යෝජනා ක්‍රියාත්මක කිරීම සඳහා අනුමැතිය ද හිමිවී ඇත. සමහර රාජ්‍ය ආයතන කාර්යක්ෂමව ක්‍රියාත්මක වන බවත් අනෙක් ඒවා පවත්වාගෙන යෑම සඳහා රාජ්‍ය හා පෞද්ගලික හවුල්කාරිත්වයන් නිර්දේශ කරන අතරම ඒවා එම ආකාරයෙන්ම කළමනාකරණය කළ යුතු බවත් කමිටුව සොයා ගෙන ඇති බවට වාර්තා වේ.
උදාහරණයක් වශයෙන් ශ්‍රී ලංකා චිත්‍රපට සංස්ථාව භාණ්ඩාගාරය මත යැපීම අවම කර ගත හැකි වන පරිදි පෞද්ගලික හවුල්කරුවකු සමඟ හවුල් වුවහොත් කාර්යක්ෂමව පවත්වාගෙන යා හැකි බවට ද එම වාර්තාවල සඳහන් වේ. එමෙන්ම පුනරුත්ථාපන කොමසාරිස් ජනරාල් කාර්යාලය, දුම්කොළ හා මධ්‍යසාර පිළිබඳ ජාතික අධිකාරිය සහ ජාතික අන්තරායකර ඖෂධ පාලන මණ්ඩලය ඒකාබද්ධ කිරීමට ද කමිටුව නිර්දේශ කර ඇති බවට වාර්තා වේ.
සර් ජෝන් කොතලාවල රෝහල කිසිදු ලාභයක් නොලබන බවත් භාණ්ඩාගාරයට බරක් වී ඇති බවත්, එබැවින් එය මූල්‍යමය වශයෙන් ශක්‍ය ආයතනයක් බවට පත් කරන්නේ කෙසේද යන්න අධ්‍යයනය කිරීම සඳහා කමිටුවක් පත් කළ යුතු බවත් කමිටුව නිර්දේශ කරයි.
ශ්‍රී ලංකා පුවත්පත් මණ්ඩලයේ ප්‍රවේශය පුළුල් කිරීම සඳහා ශ්‍රී ලේක් මාධ්‍ය මණ්ඩලය ලෙස නම වෙනස් කරමින් එය දිගටම කරගෙන යෑමට කමිටුව නිර්දේශ කර තිබේ.
විවිධ රාජ්‍ය ආයතනවලට අයත් ඉඩම් විශාල ප්‍රමාණයක් නිෂ්ක්‍රීයව පවතින බව ද කමිටුව සඳහන් කළ අතර, මහජනතාවගේ ප්‍රයෝජනය සඳහා ඒවා කළමනාකරණය කිරීමට පියවර ගත යුතු බවට ද නිර්දේශ කර ඇත.
සර් ජෝන් කොතලාවල රෝහල කිසිදු ලාභයක් නොලබන බවත් භාණ්ඩාගාරයට බරක් වී ඇති බවත්, එබැවින් එය මූල්‍යමය වශයෙන් ශක්‍ය ආයතනයක් බවට පත් කරන්නේ කෙසේද යන්න අධ්‍යයනය කිරීම සඳහා කමිටුවක් පත් කළ යුතු බවත් කමිටුව නිර්දේශ කර ඇත.
ශ්‍රී ලංකා පුවත්පත් මණ්ඩලයේ ප්‍රවේශය පුළුල් කිරීම සඳහා ශ්‍රී ලේක් මාධ්‍ය මණ්ඩලය ලෙස නම වෙනස් කරමින් එය දිගටම කරගෙන යෑමට කමිටුව නිර්දේශ කර ඇති අතර විවිධ රාජ්‍ය ආයතනවලට අයත් ඉඩම් විශාල ප්‍රමාණයක් නිෂ්ක්‍රීයව පවතින බව ද කමිටුව සඳහන් කළ අතර, මහජනතාවගේ ප්‍රයෝජනය සඳහා ඒවා කළමනාකරණය කිරීමට පියවර ගත යුතු බවට ද නිර්දේශ කර ඇති බවට සඳහන් වේ.