ජාතික ව්‍යවසාය සංවර්ධන අධිකාරියේ (NEDA) අධ්‍යක්ෂ ධනුක ලියනගමගේ මහතා පවසන ආකාරයට අනුව ශ්‍රී ලංකාවේ ව්‍යවසායකත්ව අනුපාතය වැඩකරන ජනගහනයෙන් 3%ක් පමණක් වන අතර එය කලාපීය වශයෙන් ගත් කළ සැලකිය යුතු ලෙස අවම මට්ටමක් පවතියි. ලංකා වාණිජ මණ්ඩලයේ පැවති අදාල ගෝලීය ව්‍යවසායකත්ව සතිය (GEW) 2024 දියත් කිරීමේ උත්සවයේදී ඔහු මෙම ගැටළුව පෙන්වා දුන්නේය.
ශ්‍රී ලංකාවේ ව්‍යවසායකයින් බවට පත්වන්නේ වැඩකරන ජනගහනයෙන් 3%ක් පමණ බව ධනුක ලියනගමගේ මහතා අනාවරණය කළේය. එමෙන්ම අපේ කලාපීය රටවල් හා සසඳන විට, බංග්ලාදේශයේ පවා අනුපාතය 7% ක පවතින බව මෙම මහතා පෙන්වා දීය. මෙම විෂමතාවය අපගේ ව්‍යවසායක පද්ධතියෙහි දුර්වලතාවයන් ඉස්මතු කිරීමක් සිදු කරයි.
ඉදිරි වසර තුන හෝ පහ තුළ රටේ ව්‍යවසායකත්ව අනුපාතය අවම වශයෙන් 10% දක්වා ඉහළ නංවන ලෙස ඔහු පාර්ශවකරුවන්ගෙන් ඉල්ලා සිටි අතර මෙය සාක්ෂාත් කර ගැනීම සඳහා ඉලක්කගත උපාය මාර්ග සහ පුළුල් සහයෝගය අවශ්‍ය වනු ඇතැයි ඔහු පැවසීය.
ධනුක ලියනගමගේ මහතා විසින් ව්‍යවසායකත්ව සංවර්ධනය සඳහා පරිත්‍යාගශීලීන්ගේ අරමුදල්වල මෑත කාලීන වැඩිවීම අගය කළ අතර එය නිවැරදි දිශාවේ පියවරක් ලෙස හැඳින්වූ ඔහු ශ්‍රී ලාංකීය ව්‍යවසායකයින් අතර මානසික වෙනසක් අවශ්‍ය බව අවධාරණය කළේය. රටෙහි සාක්ෂරතාවය ඉහළ අනුපාතයක තිබියදීත්, කුඩා හා මධ්‍ය පරිමාණ ව්‍යවසායන් (SMEs) අතර මූල්‍ය සාක්ෂරතාවය සැලකිය යුතු අවම මට්ටමක පවතින බව ඔහු තවදුරටත් පෙන්වා දුන්නේය.
මෙම පරතරය පියවා ගැනීම සඳහා, මූල්‍ය සාක්ෂරතාවය වැඩිදියුණු කිරීම සහ කුඩා හා මධ්‍ය පරිමාණ ව්‍යවසායකයින්ට සාර්ථක වීමට අවශ්‍ය මෙවලම් සහ දැනුම ලබා දීම සඳහා දැනුවත් කිරීමේ වැඩසටහන් පැවැත්වීමට ඔවුන් සැලසුම් කර බවත් ඔහු වැඩිදුරටත් පවසා ඇත.
මෙම මුලපිරීම් ශ්‍රී ලංකාව තුළ ශක්තිමත් ව්‍යවසායක සංස්කෘතියක් ඇති කිරීමටත්, ආර්ථික වර්ධනය සඳහා පුද්ගලයින් සවිබල ගැන්වීම සහ කලාපීය වෙළෙඳපොළ තුළ ජාතියේ තරඟකාරිත්වය ඉහළ නැංවීම අරමුණු කර ගන්නා බව මෙහිදී පෙන්වා දුන්නේය.