දේශබන්දු තෙන්නකෝන් මහතා පොලිස්පති ධුරයට පත් කිරීමට එරෙහිව ගොනුකර ඇති පෙත්සම් පවත්වාගෙන යෑමට නොහැකි බවට මූලික විරෝධතා ඉදිරිපත් කරන බව නීතිපතිවරයා ඊයේ (19) ශ්‍රේෂ්ඨාධිකරණයට දන්වා සිටියේය.
බස්නාහිර පළාත් ජ්‍යෙෂ්ඨ නියෝජ්‍ය පොලිස්පතිවරයාව සිටි දේශබන්දු තෙන්නකෝන් මහතා පොලිස්පති ධුරයට පත් කිරීමට එරෙහිව ගොනුකර තිබූ පෙත්සම් නවයක් කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් නෙරින්පුල්ලේ මහතා මේ බව දන්වා සිටියේය.
මුර්දු ප්‍රනාන්දු, කුමුදුනී වික්‍රමසිංහ සහ ප්‍රියන්ත ප්‍රනාන්දු යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම් කැඳවන ලදි.
එහිදී නීතිපතිවරයා ඇතුළු වගඋත්තරකරුවන් කිහිපදෙනකු වෙනුවෙන් පෙනී සිටි අතිරේක සොලිසිටර් ජනරල් නෙරින්පුල්ලේ මහතා සඳහන් කළේ දේශබන්දු තෙන්නකෝන් මහතා පොලිස්පතිවරයා ලෙස පත් කිරීමට එරෙහිව ගොනුකර ඇති පෙත්සම් පවත්වාගෙන යෑමට ඇති නීතිමය නොහැකියාව ඇතුළුව පෙත්සම් සම්බන්ධයෙන් මූලික විරෝධතා ඉදිරිපත් කිරීමට තමන් අපේක්ෂා කරන බවය.
එසේම පෙත්සම් විභාගයේදී අධිකරණය මඟින් ඉල්ලා සිටින ඕනෑම ලියවිල්ලක් ඉදිරිපත් කිරීමට කටයුතු කරන බව ද අතිරේක සොලිසිටර් ජනරාල්වරයා සඳහන් කළේය.
කරුණු සලකා බැලූ විනිසුරු මඬුල්ල මෙම පෙත්සම් ජූලි 08 වැනිදා කැඳවීමට තීරණය කළේය.
මෙම පෙත්සම් සලකා බැලීම සඳහා මේ වන විට අකැමැත්ත පළ කර ඇති ශ්‍රේෂ්ඨාධිකරණ විනිසුරු එස්. තුරෙයිරාජා මහතා නොමැති විනිසුරු මඬුල්ලක පෙත්සම් කැඳවන ලෙස තවදුරටත් නියම කෙරිණි.
දේශබන්දු තෙන්නකෝන් මහතා පොලිස්පති ධුරයට පත් කිරීමට එරෙහිව අගරදගුරු අතිඋතුම් කාදිනල් මැල්කම් රංජිත් හිමිපාණන්, විකල්ප ප්‍රතිපත්ති කේන්ද්‍රය, මහාචාර්ය සාවිත්‍රී ගුණසේකර, නිරෝෂන් පාදුක්ක, හිරුණිකා ප්‍රේමචන්ද්‍ර ඇතුළු පිරිසක් විසින් පෙත්සම් 09ක් ගොනු කර තිබිණි.
නීතිපතිවරයා, කථානායකවරයා ඇතුළු ව්‍යවස්ථාදායක සභාව සහ වැඩබලන පොලිස්පති දේශබන්දු තෙන්නකොන් මහතා මෙම පෙත්සම්වල වගඋත්තරකරුවන් ලෙස නම් කර ඇත.
පාස්කු ඉරු දින ත්‍රස්ත ප්‍රහාරය සම්බන්ධයෙන් සොයා බැලීම සඳහා පත් කළ ජනාධිපති කොමිෂන් සභාවේදී එවකට බස්නාහිර පළාත භාරව සිටි නියෝජ්‍ය පොලිස්පති වැඩ බලන පොලිස්පති දේශබන්දු තෙන්නකෝන් මහතා සාක්ෂි ලබා දුන් බවට පෙත්සම්වල සඳහන් වේ.
එම ත්‍රස්ත ප්‍රහාරය පිළිබඳ වැදගත් තොරතුරු ලැබී තිබියදීත් ඔහු සිය රාජකාරි ඉටු නොකළ බවට කොමිෂන් සභා වාර්තාවේ 20 වැනි වෙළුමේ පැහැදිලිව සඳහන් කර ඇති බවට පාස්කු ප්‍රහාරයේ වින්දිතයන් සිය පෙත්සම් මඟින් පෙන්වා දී ඇත.
එමඟින් එම අවස්ථාවේදී බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස කටයුතු කළ දේශබන්දු තෙන්නකොන් මහතා සිය රාජකාරි පැහැර හැර ඇති බව පෙත්සමෙහි සඳහන් වේ. එසේම ගාලුමුවදොර පිටියේ රැඳී සිටි අරගලකරුවන්ට අමානුෂිකව පහරදෙනු ලැබුවේ ද දේශබන්දු තෙන්නකෝන් මහතා, ජ්‍යෙෂ්ඨ නියෝජ්‍ය පොලිස්පතිවරයාව කටයුතු කළ සමයේ බව මෙම පෙත්සම් මඟින් පෙන්වා දී ඇත.
රටේ නීතිය ක්‍රියාත්මක කරන රටේ ප්‍රධාන දෙපාර්තමේන්තුවක් වන පොලිස් දෙපාර්තමේන්තුවේ ප්‍රධානියා මෙන්ම එහි වගකීම ලබාදිය යුත්තේ, මානුෂීය ගුණාංගවලින් හෙබි අයකුට බව සඳහන් වේ. ඊට පටහැණිව ක්‍රියා කළ පුද්ගලයකුට එහි වගකීම් පැවරීම මඟින් සිය මූලික අයිතීන් උල්ලංඝනය කිරීමක් බව පෙත්සම් මඟින් පෙන්වා දී ඇත.
එබැවින් වැඩබලන පොලිස්පති දේශබන්දු තෙන්නකෝන් මහතා පොලිස්පතිවරයා වශයෙන් පත්කිරීමේදී ව්‍යවස්ථාදායක සභාවේ අනුමැතිය ලැබුණු ආකාරය පිළිබඳ ගැටලුසහගත තත්ත්වයක් ඇති බව ද පෙත්සම් මඟින් පෙන්වා දී තිබේ.
පාස්කු ඉරිදා ප්‍රහාරය සිදු වන විට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස සිටි දේශබන්දු තෙන්නකෝන් මහතා රාජකාරිය පැහැර හැර ඇති බැවින් පොලිස්පති ධුරයට ඔහු පත් කිරීම මඟින් මෙරට ජනතාවගේ මූලික අයිතිවාසිකම් උල්ලංඝනය වීමක් සිදුවන බවට තීරණය කරන ලෙස පෙත්සම් මඟින් ඉල්ලා ඇත.